chalne kā hausla nahīñ ruknā muhāl kar diyā
ishq ke is safar ne to mujh ko niDhāl kar diyā
ai mirī gul-zamīñ tujhe chaah thī ik kitāb kī
ahl-e-kitāb ne magar kyā tirā haal kar diyā
milte hue diloñ ke biich aur thā faisla koī
us ne magar bichhaḌte vaqt aur savāl kar diyā
ab ke havā ke saath hai dāman-e-yār muntazir
bānu-e-shab ke haath meñ rakhnā sambhāl kar diyā
mumkina faisloñ meñ ek hijr kā faisla bhī thā
ham ne to ek baat kī us ne kamāl kar diyā
mere laboñ pe mohr thī par mere shīsha-rū ne to
shahr ke shahr ko mirā vāqif-e-hāl kar diyā
chehra o naam ek saath aaj na yaad aa sake
vaqt ne kis shabīh ko ḳhvāb o ḳhayāl kar diyā
muddatoñ ba.ad us ne aaj mujh se koī gila kiyā
mansab-e-dilbarī pe kyā mujh ko bahāl kar diyā
chalne ka hausla nahin rukna muhaal kar diya
ishq ke is safar ne to mujh ko niDhaal kar diya
ai meri gul-zamin tujhe chah thi ek kitab ki
ahl-e-kitab ne magar kya tera haal kar diya
milte hue dilon ke bich aur tha faisla koi
us ne magar bichhaDte waqt aur sawal kar diya
ab ke hawa ke sath hai daman-e-yar muntazir
banu-e-shab ke hath mein rakhna sambhaal kar diya
mumkina faislon mein ek hijr ka faisla bhi tha
hum ne to ek baat ki us ne kamal kar diya
mere labon pe mohr thi par mere shisha-ru ne to
shahr ke shahr ko mera waqif-e-haal kar diya
chehra o nam ek sath aaj na yaad aa sake
waqt ne kis shabih ko KHwab o KHayal kar diya
muddaton baad us ne aaj mujh se koi gila kiya
mansab-e-dilbari pe kya mujh ko bahaal kar diya
0 Comments